24 Mars 1999 ora 20.00. NATO-ja nisi bombardimet ndaj caqeve ushtarake serbe.<br /><br />Por këtë gëzim nuk e përjetuan gjatë banorët e Krushës së Madhe, fshat i komunës së Rahovecit.<br /><br />Më 25, 26 dhe 27 Mars në këtë fshat ndodhi një nga masakrat më të mëdha të luftës ku u vranë e masakruan 243 banorë të këtij fshati, kryesisht burra.<br /><br />Edhe pas 20 vjetësh për këtë masakër nuk është dënuar askush.<br /><br />Fahrie Hoti në këtë masakër ka humbur bashkëshortin, bashkë me 11 anëtarë të tjerë të familjes. Këto janë varret e zbrazëta, pasi 64 persona të vrarë rezultojnë të pagjetur përfshirë edhe bashkëshortin e Fahrijes.<br /><br />Në mesin e të zhdukurve është edhe veprimtari Ukshin Hoti. I lindur në këtë fshat, shtëpia e të cilit së fundmi është shndërruar në shtëpi muze.<br /><br />Ai ishte zhdukur në ditën kur ishte liruar nga burgu.<br /><br />Janë gjithsej 164 gra që kanë mbetur të veja në këtë fshat.<br /><br />Ndonëse me dhimbje për humbjet e mëdha si nëna vetushqyese pas luftës, gratë e veja të këtij fshati me iniciativë të Fahrijes kanë nisur të merren me konservimin e produkteve bio.<br /><br />Nga 5 gra sa nisën punën në vitin 2005 tash numri i tyre është rritur në 50.<br /><br />Ndërsa nuk mungojnë vizita posaçërisht gjatë Marsit në këtë kompleks memorial dhe gratë e Krushës, të cilat dëshmojnë mbijetesën dhe sakrificën e popullit shqiptar.<br /><br />Tv Klan
