Për tre orë, opozita jo parlamentare mbajti protestën e shtatë kundër qeverisë së kryeministrit Edi Rama. Nisi rreth orës 10:00 në të njëjtën kohë me nisjen e seancës plenare të Kuvendit, me mbledhjen e protestuesve para Kuvendit në disa tentativa të vazhdueshme të mbështetësve për të çarë kordonin e sigurisë në hyrje të Kuvendit. Të gjitha këto tentativa u udhëhoqën nga ish-deputetët demokratë që qëndruan në ballë të turmës duke shtyrë me forcë efektivët e policisë. E pazakonta e kësaj proteste, ishte tentativa në nisje të saj, për të cënuar sigurinë e një delegacioni holandez të mbërritur në Tiranë, kryesuar nga ministri i Drejtësisë Ferdinand Grapperhaus.<br /><br />Nën drejtimin e ish-deputetëve Klevis Balliu dhe Albana Vokshi, protestuesit e mbledhur para ministrisë së Brendshme ku Sandër Lleshaj do të priste delegacionin, tentuan disa herë të çajnë kordonin e policëve. Situata u stabilixua nga policia me mbërritjen e delegacionit, të cilët në fakt nuk shfaqën asnjë shenjë interesi për protestën që zhvillohej pas shpinës së tyre.<br /><br />Ndërkohë, pas disa fjalimeve politike tek Kuvendi, liderët politikë udhëhoqën turmën në një marshim proteste. U ndalën sërish tek Ministria e Brendshme, ku protestuesit sulmuan me bojë fasadën e ministrisë, ndërsa në heshtje jashtë ministrisë qëndronin përballë njëri-tjetrit kryedemokrati Lulzim Basha dhe lideri historik i PD-së, Sali Berisha. Më tej marshimi vijoi drejt selisë blu, aty ku opozita mbylli pas tre orësh protestën, me një fjalim të liderit të opozitës Lulzim Basha.<br /><br />Tubimi i radhës i opozitës kundër qeverisë do të jetë me 13 Prill, para kryeministrisë.
