Katër persona të maskuar dhe të armatosur hynë rreth orës 15:00 në pistën e aeroportit të Rinasit dhe grabitën një shumë të konsiderueshme parash.<br /><br />Bëhet fjalë për disa miliona Euro të një banke të nivelit të dytë që u dërguan në një avion të linjës Tiranë ? Vienë nga një makinë e kompanisë "Nazeri 2000".<br /><br />Nuk ka ende të dhëna zyrtare për shumën e saktë që është grabitur, por dyshohet se bëhet fjalë për afro 2 milionë Euro.<br /><br />Grabitësit kanë hyrë me një furgon nga ana e parkingut 24 orësh të pasagjerëve dhe kanë dalë nga një portë në krah të rruges Rinas ? Fushë Krujë, porta e zjarrfikësve, e njëjta nga ku 3 vjet më parë hyri edhe një Mercedes që u përdor për një grabitje të ngjashme. Nën kërcënimin e armëve kanë marrë thasët me para në furgon dhe në pjesën e kargos së avionit.<br /><br />Autorët për të kryer grabitjen përdorën një furgon të bardhë me mbishkrimin "Kontrolli Tatimor" dhe më pas dolën nga e njëjta portë.<br /><br />Disa pasagjerë të avionit dëshmuan se grabitësit u vendosën armët në kokë punonjësve të policisë private. Thanë se ishin veshur me rroba të zeza dhe antiplumb dhe besuan se bëhej fjalë për një stërvitje policore.<br /><br />Pas rreth 800 metrash pasi kanë dalë nga pista, grabitësit janë përballur me forcat e policisë, të cilat ndodhen të stacionuar pranë aeroportit. Ata kanë qëlluar me armë ndaj efektivëve, të cilët u kundërpërgjigjën. Nga shkëmbimi i zjarrit, ka mbetur i vdekur njëri nga grabitësit.<br /><br />Personi i vrarë është hedhur nga furgoni dhe tre grabitësit e tjerë i janë drejtuar Fushë-Krujës. Në ndjekje janë vënë forca të shumta speciale, ndërkohë që në operacion ka marrë pjesë dhe një helikopter i Ministrisë së Brendshme.<br /><br />Furgoni me logon e "Hetimit Tatimor" është gjetur i djegur pranë vendit ku mbeti i vrarë grabitësi. Rreth një orë më pas, një tjetër furgon u gjet i djegur mes Kamzës dhe Bathores. Brenda ka pasur një arsenal të rëndë armësh.<br /><br />Televizioni Klan mëson se janë nxjerrë 4 urdhra-arresti, ndërkohë që rreth 40 persona janë shoqëruar në polici dhe po merren në pyetje për ngjarjen.<br /><br />Tv Klan
