Kompania 'Real Fortress Private Limited', e cila ka blerë kundrejt 82.2 milionë Euro 100% të aksioneve të aeroportit të Rinasit është krijuar në datën 22 Qershor të vitit 2016, ndërsa statusi i saj është bërë aktiv vetëm disa javë përpara (Shtator 2016) se të blinte të drejtat koncesionare të aeroportit të vetëm ndërkombëtar në Shqipëri.<br /><br />Kompania është themeluar në Republikën e Singaporit, ndërsa është bërë pronare e kontratës së operimit të aeroportit Nënë Tereza më 4 Nëntor të 2016-s, të drejta të cilat i bleu nga 3 firmat gjermane që ishin aksionere të Rinasit.<br /><br />Shoqëria rezulton që të mos ketë patur më parë eksperienca në fushën e operimit të aeroporteve, ndërsa publike bëhen vetëm emrat e drejtorëve të saj, por jo të pronarëve, pasi funksionon nën rregullat offshore, parajsa fiksale të cilat nuk japin të dhëna mbi aksionerët.<br /><br />'Real Fortress Private Limited' ka emëruar të njëjtin administrator për të bërë menaxhimin e aeroportit, i cili ka mbajtur këtë post edhe gjatë periudhës së pronarëve gjermane. Madje një vit më parë, bordi i saj vendosi të riemërojë deri më Korrik të vitit 2020 shtetasin gjerman Rolf Castro Vasquez.<br /><br />Në kulmin e hetimeve të nisura nga autoritetet hetimore shtetërore, dhe kur qeveria ka bërë përgjegjëse për ngjarjen e rëndë të grabitjes së të mërkurës të milionave Eurove në pistën e Rinasit, mësohet se administratori është larguar nga Shqipëria.<br /><br />Nga ana tjetër, ministrja Belinda Balluku nuk ka pranuar të mbajë më takime me të, por vetëm me drejtuesit e lartë të kompanisë mëmë, pasi ka vlerësuar një arrogancë nga ana e menaxharëve që janë në Shqipëri.<br /><br />Tv Klan
