Menjëherë pasi aleatët e Lulzim Bashës shpalosën platformën për zgjidhjen e krizës politike, kryetari i Partisë Demokratike tha se qëndrimet e partive opozitare janë në përputhje të plotë me marrëveshjen e firmosur pak ditë më parë.<br /><br />"Nuk ka asnjë mospërputhje mes qëndrimeve të PD dhe gjithë koalicionit tonë. Një pjesë e mirë e pikave që aleatët kanë shpalosur sot janë dhe pikat e programit tonë, ka një përputhje totale. Koalicioni opozitar po vepron me bashkëpunim, mirëkuptim dhe sinergji të plotë për të ecur përpara".<br /><br />Pika që e ndan me aleatët e tij është ulja në tryezën e dialogut me Kryeministrin Rama, largimin e të cilit e ka një kusht të panegociueshëm për mbajtjen e zgjedhjeve të lira e të ndershme.<br /><br />"Regjistrimi në zgjedhje dhe pjesëmarrja në zgjedhje vetëm kur të ketë vërtetë zgjedhje dhe jo një farsë kriminale dhe kushti për këtë mbetet largimi i Edi Ramës nga qeveria dhe një qeveri tranzitore që do të plotësojë kushtet për të cilat do të keni më shumë informacione në ditët në vijim".<br /><br />Ndonëse Lulzim Basha ka paralajmëruar bojkotin e zgjedhjeve nëse nuk plotësohen kushtet që garantojnë një garë të ndershme, Partia Demokratike synon që kandidatët në zgjedhjet e ardhshme do të dalin nga primaret. Një formë demokratizimi dhe modernizimi kjo e PD-së sipas Bashës, për të cilën po japin kontributin përfaqësues të Institutit Ndërkombëtar Republikan.<br /><br />Tv Klan
