PEQIN-Një person ka humbur jetën, e ndërsa katër të tjerë janë plagosur rëndë, si pasojë e një aksidenti rrugor në Peqin.<br /><br />Ngjarja ka ndodhur te ?Kryqëzimi i Gjocaj?, ku dy automjete janë përplasur me njëra-tjetrën, duke regjistruar një viktimë dhe katër plagosur. Personat e përfshirë në ngjarje të rëndë po ktheheshin nga një gëzim familjar, i cili fatkeqësisht u mbyll me një fund tragjik. <br /><br />Nga informacionet paraprake mjeti tip ?Toyota?, ku po udhëtonte viktima dhe dy nga të plagosurit ka kryer parakalim të gabuar. Ndërkohë, mjeti tjetër tip Ford drejtohej nga Kamber Beqiri, i plagosur rëndë dhe së bashku me të ka qenë një tjetër person, i cili ka marrë dëmtime të lehta. <br /><br />Identiteti i viktimës nuk dihet ende, por mësohet se ajo është grua, e ndërsa edhe bashkëshorti i saj është në gjendje të rëndë. Gazetari i Report Tv Aldo Kozarja, ka mësuar se dy nga të plagosurit janë Ismail Hoxhallari dhe Gëzim Braho nga Korça, të cilët janë dërguar me urgjencë në spitalin e Peqinit. Fatmirësisht, për shkak të pozicionit të favorshëm gjeografik, në vendngjarje kanë mbërritur tre ambulanca, nga Peqini, Rrogozhina dhe një nga Elbasani, të cilët kanë dhënë në kohë ndihmën e parë mjekësore.<br /><br />Paraprakisht dyshohet se shkak i aksidentit ka qenë shpejtësia tej normave të lejuara. Siç mund ta shihni nga fotot e siguruara nga Report Tv, përplasja e dy automjeteve ka qenë shumë e fortë, aq sa mjeti Toyota është kthyer përmbys, e ndërsa mjeti tip Ford ka marrë dëmtime të rënda nga njëri krah.
