Sikur në vitin e largët 1925 do të kishim mundësinë të intervistonim arkitektin italian Armando Brasini për planin e tij rregullator që "veshi" Tiranën me Bulevardin, ministritë, stadiumin, e ndërtesat që vlerësojmë dhe ruajmë sot, besoj do të ishim të lumtur. Po ashtu, nëse do të pyesnim Giulio Berte'-në për Teatrin Kombëtar që ai ndërtoi për tjetër gjë njëherë e një kohë e që sot do të zëvendësohet nga Teatri i Bjarke Ingelsit. Po Gherardo Bosio që projektoi të famshmin stadium "Qemal Stafa", çfarë do të mendonte për arkitektin fiorentin Marco Casamonti që po bën Arenën Kombëtare sot?<br /><br />Italianët, në kohë të kohëve, kanë veshur me estetikë Shqipërinë ose kanë kërkuar thellë saj, si arkeologu Luigi Maria Ugolini, zbulues i Butrintit e Foniqit të lashtë.<br /><br />Sot, në Tiranë, hap studion e tij një tjetër ekselencë e arkitekturës italiane e botërore, Stefano Boeri, me veçantinë e tij dhe ndjeshmërinë që e bën të ndryshëm mes shumë arkitektëve të njohur në botë: Dashurinë dhe pasionin për gjelbërimin.<br /><br />Situata e ndezur politike, përplasjet e përhershme mes shqiptarësh që nuk e mendojnë njësoj, nuk na japin kohën e duhur të shijojmë ashtu siç duhet evente të rëndësishme. Plani rregullator Tirana 2030, projektuar nga Stefano Boeri, është një himn për ringjalljen e natyrës pranë qendrave të banimit. Jemi me fat që një arkitekt italian me këto përmasa e këtë vizion, ka "qëndisur" kryeqytetin e të ardhmes, që besoj, brezat që do të vijnë do ta admirojnë e do të jenë krenarë. Përplasjet dhe kontradiktat e sotme na bëjnë të mos vëmë re e të shohim se si para nesh po merr jetë një e ardhme që ende qytete e kryeqytete të vendeve edhe më të zhvilluara se ne sot ende po e diskutojnë: Natyrën në qytet. Bashkëjetesën me gjallesa që ishin larguar dhe gjelbërimin e zonave të banuara, tema që po preken nga ambjentalistë sot kudo në botë. Temë për të cilën vogëlushja Greta Thunberg po bën një betejë: Atë të rigjelbërimit dhe të shpëtimit të Planetit tonë të shtrenjtë.<br /><br />Për Tiranën, Shqipërinë dhe të ardhmen e saj në Europë folëm me arkitektin Stefano Boeri, i cili, mes kaosit e zhurmës sonë arrin të shohë jo vetëm të bukurën mes nesh, por edhe vlerat që si Shqipëri e si komb kemi për në Evropë.
