Ka shkuar në 93 numri i personave të helmuar në qytetin e Bulqizës, ku shkaku kryesor dyshohet të jetë uji i pijshëm. Qytetarët, në mesin e të cilëve ka burra, gra dhe rreth 24 fëmijë, janë paraqitur në ambientet e spitalit me marrje mendësh dhe të vjella. <br /><br />Vetë banorët shprehen se kanë pasur dhimbje barku, të vjella dhe dhimbje koke. <br /><br />"Kisha pëzierje, të vjella, dhimbje barku. Kam që mbrëmë kështu. Uji nuk është i pijshëm ka një shije të keqe. Kam dërguar mbrëmë vajzën e madhe në spital ndërsa sot edhe kjo e vogla më thotë që më përzihet", shprehet disa nga banorët e zonës.<br /><br />Mjekët pohojnë se nisur nga simptomat, dyshohet se shkak i helmimit mund të jetë uji i pijshëm.<br /><br />Drejtori i Ujësjellësit, Nedion Muça ka mohuar që shkak ka qenë uji, ndërsa ka shtuar se për të vërtetuar dyshimet paraprake të mjekëve duhet të pritet 48 orë për përgjigjet e analizave.<br /><br />Ndërkohë mësohet se banorët e lagjes së 'Qytetit të Vjetër' janë lajmëruar të mos konsumojnë ujë nga çezma. Rrjeti i ujësjellësit në Bulqizë është bërë vite më parë dhe tubacionet janë të amortizuara.
