Pas vendimit të Francës dhe Gjermanisë për anulimin e takimit të Parisit që ishte paraparë të mbahej më 1 Korrik ndërmjet palës kosovare e asaj serbe, Kryeministri Ramush Haradinaj ka zhvilluar një takim me partnerin e koalicionit qeverisës, kryeparlamentarin Kadri Veseli.<br /><br />Haradinaj ka thënë se nuk i di arsyet se pse është shtyrë Samiti i Parisit. Ai ka vlerësuar se pas takimit të Berlinit, procesi i dialogut është qartësuar dhe se nga ai takim është konfirmuar se e vetmja gjë që ka mbetur pa u zgjidhur është njohja reciproke në kufijtë ekzistues.<br /><br />"Tek takimi i Parisit sa herë del hairi del dhe sherri, është mirë që po qartësohet. Edhe takimi i Berlinit ka konfirmuar se e vetmja gjë që ka mbetur pa u zgjidh është njohja reciproke në kufijtë ekzistues".<br /><br />Sipas tij, pas takimit të Berlinit është kuptuar se palët nuk janë ende të gatshme të ulen për të biseduar për marrëveshjen finale.<br /><br />Për analistin Fisnik Halimi, anulimi i këtij takimi nuk ka të bëjë me kërkesën e Serbisë për heqjen e taksës si kusht për takim, por me problemet e brendshme të Bashkimit Europian.<br /><br />Ditë më parë, Beogradi zyrtar ka insistuar për anulimin e këtij takimi duke thënë se nuk do të zhvillohet takim pa u hequr taksa ndaj produkteve serbe të vënë nga qeveria e Kosovës në Nëntor të vitit të kaluar.<br /><br />Tv Klan
