Parlamenti nuk ka miratuar ende projektligjin për koncesionet dhe partneritetin publik-privat, duke bërë të pavlefshëm hyrjen në fuqi të ndalimit të ofertave të pakërkuara nga 1 korriku i këtij viti.<br /><br />Ishte fillimisht Fondi Monetar Ndërkombëtar e më pas Banka Botërore, që kërkuan ndalimin e ofertave të pakërkuara në kontrata shtetërore. Qeveria punoi për të ndryshuar ligjin aktual, ndërsa projekti i sjellë në fillim të këtij viti mori votat e deputetëve të mazhorancës gjatë diskutimit në komisionet parlamentare.<br /><br />Por pavarësisht kësaj, ligji i ri ende nuk është miratuar seancë plenare prej 4 muajsh. Mësohet se projektligji është futur në rendin e ditës për t?u votuar në muajin Prill, por më pas është tërhequr.<br /><br />Në bazë të procesverbaleve të Kuvendit, rezulton se kërkesa për tërheqjen e tij është bërë nga kreu i grupit parlamentar socialist Taulant Balla, i cili po ashtu rezulton të ketë patur edhe një debat për këtë çështje me kreun e Komisionit të Ekonomisë, Arben Ahmetaj.<br /><br />Ky i fundit ka insistuar në miratimin e shpejtë të ligjit si një kërkesë që ka ardhur nga institucionet financiare ndërkombëtare.<br /><br />Ndryshimet e bëra në ligjin e koncesioneve ndalojnë ofertat e pakërkuara në fushën e infrastrukturës dhe po ashtu përjashtojnë dhënien e bonusit për sektorët e tjerë ku lejohet të ketë propozime të tilla si portet, aeroportet, energjia, turizmi dhe bujqësia.<br /><br />Nëse një kompani shpreh interes për të ndërtuar një vepër dhe dorëzon projektin, ligji që duhet të miratohet vendos standardin e eleminimit të shpërblimit me pikë shtesë në garë, e në bazë të ofertës më të mirë ekonomike shpallej fituesi, ndërsa pala propozuese merr në formë pagese shpenzimet për bërjen e projektit.<br /><br />Tv Klan
