Një ndërtesë e cila deri në orën 19:00 të ditës së djeshme shërbeu si qendër votimi për zgjedhjet vendore të 30 qershorit, është sulmuar me armë pas mesnatës, rreth orës 01:00 të mëngjesit. Ngjarja ndodhi në fshatin Fushë-Kuqe në Kurbin. Gjatë ditës nuk ka pasur asnjë problem në asnjë qendër në Kurbin, por sapo votimet kanë përfunduar dhe kutitë janë dërguar në KZAZ-në e Laçit.<br /><br />Godina në fjalë është tre katëshe dhe shërben edhe si lokal dasmash dhe agjenci udhëtimesh, ndodhur në qendër të fshatit, tek kryqëzimi i Fushkuqes. Nga të shtënat me armë ka pasur dëme të shumta materiale, por ka shkaktuar panik tek banorët e Fushëkuqes që kanë dëgjuar atë se çfarë ndodhi. Godina ku ndodhi sulmi që gjatë ditës kishte shërbyer si qendër votimi, është në pronësi të Vasil Ulajt, një person që njihet i qetë dhe pa probleme në zonë. <br /><br />Sipas burimeve konfidenciale objektiv i sulmit kanë qenë vetëm ambientet që u dhanë me qira për qendër votimi. Kjo ngjarje nuk është raportuar nga policia, por teksa gazetari i Report Tv raportonte lajmin, në studion e lajmeve ishte i ftuar zv.ministri i Brendshëm Besfort Llamallari, i cili nuk dha një përgjigje nëse kishte informacion për ngjarjen. Ai tha se raste të tilla janë sporadike dhe nuk e kanë cënuar procesin dhe se shumë shpejt do të zbardhen dhe se autorët do të vihen para lgijit. <br /><br />"Raste sporadike, janë thjesht shkelje të ligjit të kryera nga persona konkret që është çështje kohe derisa të vihen para përgjegjësisë ligjore", tha ai.<br /><br />Ndërkohë referuar informacioneve ende jo zyrtare, dyshohet që autorë të mund të jenë të afërm të pronarit të ndërtesës.
