Ka qenë rraskapitës udhëtimi për mijëra pushues që kishin zgjedhur të pushonin në bregdetin e Vlorës këtë fundjavë. Trafiku ka qenë kilometrik që në orët e para të mëngjesit.<br /><br />Radha e gjatë e automjeteve niste që në dalje të Vlorës, por më e rënduar situata ishte në zonën e Ujit të Ftohtë në hyrje të tunelit dhe nga Radhima në Orikum.<br /><br />Për shkak të rrugës së ngushtë me vetëm dy kalime dhe fluksit të lartë të pushuesve ka bërë që në rrugë të qarkullohet me vështirësi.<br /><br />Policia rrugore është përpjekur të normalizojë qarkullimin e mjeteve, por duket se kjo ka qenë e pamundur.<br /><br />E njëjta situatë është përsëritur edhe në orët e pasdites. Situata është përkeqësuar edhe për shkak të përplasjes së një autobusi me pasagjerë nga i cili nuk ka pasur të lënduar, por që ka ndikuar në rëndimin e trafikut.<br /><br />Fundjavat këtë sezon turistik janë kthyer problem mjaft të madh për sa i përket lëvizjes së automjeteve për shkak të fluksit të madh të pushuesve që udhëton drejt jugut.<br /><br />Trafik të rënduar këtë fundjavë raportohet se ka pasur edhe në Durrës, në rrugën drejt Gjirit të Lalëzit, në hyrje të Lezhës, si dhe në drejtim të Velipojës.<br /><br />Tv Klan
