Një ditë pas vrasjes së Gramoz Nakos në lagjen 7 në Korçë, policia gjeti të vetëvrarë kunatin e tij Sefedin Zenellari. Këtë të martë, 71-vjeçari do të shoqërohej për ngjarjen pasi ishte i dyshuari kryesor si autor i krimit.<br /><br />Policia do të presë ekspertizën për të mësuar nëse vetëvrasja e Zenellarit është kryer me të njëjtën armë që ai vrau kunatin e tij. Hetimet janë përqëndruar në pistën e grabitjes. 57-vjeçari Gramoz Nako kishte pak kohë që ishte kthyer nga Shtetet e Bashkuara.<br /><br />Të hënën, Zenallari i kishte shkuar në shtëpi burrit të motrës së tij dhe pas një sherri e kishte qëlluar 3 herë me pistoletë. Në kanatjeren e viktimës u gjetën shenja të grisurash çka tregon se më herët ka patur një përleshje mes tyre.<br /><br />Nisur nga deklarimet e familjareve të Nakos, mësohet se pas kontrollit të ushtruar në banesën e tij, mungonte shuma prej 13 mijë Euro, që dyshohet se është grabitur nga 71-vjeçari Zenellari. Ky i fundit njihej në qytet si njeri i mbyllur, sidomos pas divorcit.<br /><br />Qytetarja: E njoh si komshi këtu, por unë nuk dal sepse rri shtrirë se jam me diabet.<br /><br />Gazetarja: Po me kë jetonte ky?<br /><br />Qytetarja: Vetëm.<br /><br />Gazetarja: Po gruan fëmijët ku i kishte?<br /><br />Qytetarja: Nuk di gjë.<br /><br />Gazetarja: Ishte person i qetë?<br /><br />Qytetarja: Po ai pa grua unë pa burrë, unë me hallet e mia ai me hallet e veta?<br /><br />Gazetarja: Nuk kishit dëgjuar për ndonjë konflikt?<br /><br />Qytetarja: Jo.<br /><br />Sefedin Zenellari, ishte baba i dy fëmijëve, por prej kohësh jetonte i vetëm pasi ishte divorcuar nga bashkëshortja.<br /><br />Tv Klan
