Tirana përjetoi mbrëmë momente kaotike si pasojë e një lajmi të rremë që u shpërnda nga disa portale për një tërmet të fuqishëm 6 ballësh që do të godiste qytetin në orën 23:30.<br />Mijëra familje, gra, burra, të moshuar, fëmijë e të sëmurë, të tmerruar nga ky lajm fals, lanë shtëpitë e tyre në mes të natës dhe dolën nëpër rrugë e nëpër parqe për t?u qëndruar larg ndërtesave.<br />Morën me vete çka mundën për të kaluar natën jashtë. <br />Shumë të tjerë, nën panik, braktisën qytetin. Rrugët dalëse të Tiranës u bllokuan nga fluksi i makinave që nxitonin të largoheshin. <br />Ministrja e Mbrojtjes u detyrua të dalë në një konferencë në mesnatë për të qetësuar qytetarët. <br />Edhe Qendra Europiane e Sizmiologjisë postoi një njoftim, nëpërmjet të cilit i ftonte qytetarët që të mos i dëgjonin lajmet e rreme, duke sqaruar se tërmetet nuk mund të parashikohen. <br />Lajmi që shkaktoi panikun e paprecedentë i referohej një interviste të sizmiologut grek Akis Tselentis. Por intervista ishte tjetërsuar nga portalet për arsye ende të paqarta dhe çoi në pështjellim gjithë Tiranën dhe jo vetëm. <br />Për më tepër, ai erdhi në kontekstin e tërmetit 5.8 ballë të së shtunës që u ndje fuqishëm në Tiranë e Durrës, por edhe të deklaratave të bëra në muajin Korrik nga Presidenti i Republikës së Shqipërisë, Ilir Meta, i cili tha se Shqipëria dhe Ballkani rrezikoheshin nga një tërmet apokaliptik. <br />Presidenti sqaroi në atë kohë se iu referua sizmiologut grek Tselentis, ndonëse sizmiologu e mohoi vetë të kishte bërë një deklaratë të tillë dhe veç të tjerash, ai rezulton i paditur disa herë në gjykatë si mashtrues, për shkak se ka përhapur panik tek qytetarët nëpërmjet parashikimeve të pasakta për tërmetet në Greqi.
