SARANDË- Jo vetëm mbeturina, por edhe një sasi e madhe gomash automjetesh janë nxjerrë gjatë një aksioni për pastrimin e nën detit në Sarandë. Ky është aksioni i dytë që zhvillohet në këtë qytet, ku pak javë më parë nga këta vullnetarë janë nxjerrë nga nën deti 75 goma automjetesh dhe dhjetëra kg mbeturina të tjera.<br /><br />Këtij aksioni përveç vullnetarëve nga qyteti i Sarandës, i janë bashkuar edhe vullnetarë nga vende të tjera, të cilët janë gjendur me pushime në qytetin bregdetar.<br /><br />"Sot vazhdojmë fazën e dytë të pastrimit të detit Jon, që për koiçidencë quhet deti Jon, pra i joni, që ne duhet ta mbajmë pastër pasi është shtëpia jonë. Sot në bashkëpunim me qytetarët e Sarandës, rininë e këtij qyteti vazhdon pastrimin e nëndetit më shumë si një fushatë sensibilizuese për mos ta ndotur më natyrën e Shqipërisë", u shpreh Adriatik Lapa.<br /><br />"Do thoja që më kollaj është ta mirëmbajmë që mos të hedhim mbeturina sesa të detyrohemi ta pastrojmë. Fare thjeshtë. Kaq dhe jemi në rregull", tha Shkëlqim Beqaj.<br /><br />"Shpresoj që kjo të bie në vesh të qytetarëve për mirë. Domethënë mos ta ndotim më tej. Dhe që të bashkohen dhe ta pastrojmë", u shpreh Sajmir Kushova.<br /><br />Qëllimi i aksioni ishte pastrimi i nën detit nga mbeturinat, por edhe sensibilizimi për mos hedhjen e mbeturinave dhe mbajtjen pastër të plazheve dhe detit, pasi turizmi si ekonomia bazë për shumicën e familjeve sarandjote kërkon edhe plazhe dhe ambient të pastër.
