Hosea 6:1 - “Andeha hiverina ho amin'i Jehovah isika; Fa Izy no namiravira, ary Izy ihany no hahasitrana antsika; Izy no namely, ary Izy no hamehy ny ferintsika.” <br /><br />Hody aho <br /><br />Vorona taitram-basy aho ry devoly ka tsy hijanona intsony <br />Ka veloma mavesabesatra no apetrako anao <br />‘Leo ny mifotetaka amin'ny tany aho <br />Ka aleo mba hiakatra ambony <br />Ary hiaina amin'ny fiainan-tsoa mamiratra sy vaovao <br /><br />Rovitra voro-damba ve no sisa navelan'ny fahotana <br />Ho tinafin'ny tenako efa reraka sy mahia <br />Hatramin'ny masoko aza no voarakitry ny haizin'ny fahajambana <br />Tsy nahita ny harato fandrika ka dia ndre nikodia <br /><br />Hamantana tany foana toa avandra ririna ianao satana <br />Raha toa mikasa ny mbola hiverina ato anatiko indray <br />Fa ny aizina be taloha efa voaroaka ny taratry ny hazavana <br />Ahitako ilay lalan-tsara zay makany am’ Ray <br /><br />Aza hitsahinao re ny lambako ry ngahy losifera fa ny andro hariva <br />Tsy te hierika anao intsony aho f'efa leo sady fay <br />F'efa injany fa re manako sy mikalo any ho any ny feon'antsiva <br />Miantsoantso izay mbola tara rehetra hody amin'izay <br /><br />Tsenao amin'ny indrafonao aho razoky Jesô f'efa tonga saina <br />Hatolory ny tananao re zaho fa vizana re eee <br />Mifaly aho raha toa ka raisinao no sady tsy maty fo aman'aina <br />Ohatr'izay aho efa voatono tany anaty afo be <br /><br />Oooo ! <br /><br />Laurent Rakotomamonjy
