Policia nuk ka arritur të gjejë Agim Kajmakun, ish-Kryetarin e Bashkisë së Vorës, i shpallur në kërkim me tre akuza, atë të shpërdorimit të detyrës, falsifikimit të formularëve dhe ushtrimi i funksioneve pas mbarimit të detyrës.<br /><br />Uniformat blu kanë ushtruar kontrolle në disa banesa, por pa rezultat. Prokurori Kolë Hysenaj i kishte lënë afat ish-kreut të Bashkisë së Vorës që të paraqitej ditën e martë në Prokurori, në të kundërt do të shoqërohej forcërisht.<br /><br />Por Kajmaku, që ka ngarkuar një avokat për ta ndjekur këtë çështje ka zgjedhur të arratiset.<br /><br />Referuar sistemit TIMS, Kajmaku ndodhet ende në territorin shqiptar. Kështu pretendojnë edhe familjarët, të pyetur nga Tv Klan.<br /><br />Policia dyshon se ai po fshihet tek miq apo të afërm të tij, por nuk përjashtohet mundësia që të këtë kaluar ilegalisht kufirin.<br /><br />Numri i telefonit të tij celular rezulton i padisponueshëm.<br /><br />Kajmaku, që në pak ditë e sheh veten nga drejtimi i Bashkisë së Vorës, në një të kërkuar nga drejtësia, akuzohet nga prokuroria se ka shkarkuar dy nënkryetarët e Bashkisë, Omeri dhe Hekuran Brahimaj, pasi KQZ i kishte hequr mandatin atij, për shkak se kishte fshehur një hetim në Greqi, për përdorim të parave false.<br /><br />Në këtë detyrë ai emëroi shefin e tij të kabinetit Gentian Picarin, por prokuroria thotë se ashtu si në shkarkimi e dy nënkryetarëve, edhe në këtë vendim ai ka falsifikuar datën.<br /><br />Nëse akuzat e prokurorisë do të provohen në gjykate, dy nënkryetarët do të kthehen në detyrë dhe Këshilli Bashkiak do të ketë mundësinë të zgjedhë njërin prej tyre për të ushtruar funksionet e kryetarit, deri në zgjedhjet e pjesshme, që duhen dekretuar nga Presidenti i Republikës, Ilir Meta.<br /><br />Tv Klan
