Pas tri godinave në Qytetin Studenti dhe disa të tjerave tek Universiteti Bujqësor i Tiranës të cilat do të shemben, duket se të njëjtin fat do të pësojë edhe dy godina tek Konviktet e Universitetit të Mjekësisë. Nga tërmeti i 26-nëntorit, dëme të mëdha kanë pësuar dy nga tetë godina që ka konvikti. Konkretisht dëmet më të mëdha janë tek godina nr.3 dhe ajo nr.4 që ndodhen anash rrugës.<br /><br />Ndërkohë të gjithë studentët që jetonin në këto godina janë zhvendosur nga aty, për në godinat e konvikteve të Universitetit të Inxhinierisë së ndërtimit. Zbrazja e godinave nga studentët, është kërkuar pasi pritet që godinave në fjalë tu bëhet një ekspertizë më e thelë edhe nga brendësia.<br /><br />Ndërkohë të gjithë studentët që nuk pranojnë që të transferohen do tu kthehen mbrapsht të gjitha pagesat e bëra për të qëndruar në këto konvikte.<br /><br />Universiteti i mjekësisë me anë të një urdhri nga rektorati, vijon të mos zhvillojë procesin mësimor për shkak të dëme të shkaktuara nga tërmeti i 26 nëntorit. Pezullimi është deri më datën 13 dhjetor ndërkohë që ende nuk dihet nëse do të shtyhet data sërish.
