Hetimet e policisë kane zbardhur dinamikën e atentatit të ndodhur mbrëmjen e të premtes në Peqin, ku mbeti i vrarë Andi Zylyfi 26 vjeç dhe u plagos shoku i tij Ardit Uruçi 23 vjeç.<br /><br />Burime nga grupi hetimor bëjnë me dije se viktima dhe miku i tij janë qëlluar me breshëri automatiku sapo kanë dalë nga një lokal dhe kanë hipur në makinën e tyre.<br /><br />Hetuesit kanë parë pamjet e kamerave të sigurisë së disa bizneseve, të cilat kanë filmuar momentin kur atentatorët i janë afruar makinës së viktimës dhe kanë qëlluar me kallashnikov.<br /><br />Më pas ata janë larguar me shpejtësi me një makinë në drejtim të Rrogozhinës, ku edhe kanë humbur gjurmët.<br /><br />Atentatorët kanë qenë të pamaskuar, por mbanin kapele. Policia gjeti në vendin e ngjarjes 14 gëzhoja kallashnikovi.<br /><br />Hetuesit thonë se viktima është mbajtur nën vëzhgim nga personat që kanë organizuar atentatin, çka ngre dyshime se dy vrasësit kanë pasur bashkëpunëtorë të tjerë që kanë parë lëvizjet e Zylyfit dhe mikut të tij.<br /><br />Pista kryesore e hetimit është ajo e hakmarrjes për shkak të lidhjeve familjare që viktima 26-vjeçar Zylyfi kishte me Endrit Alibeaj, i cili u ekzekutua një vit më parë në rrethrrotullimin e Bradasheshit bashkë me dy shtetas të tjerë.<br /><br />Tv Klan
