34 persona kanë humbur jetën vetëm në 11 muaj të vitit 2019, si pasojë e aksidenteve në punë. Sektorët që janë shënuar më shumë jetë të humbura janë ndërtimi dhe ndërmarrjet prodhuese siç është fasoneria.<br /><br />Referuar të dhënave zyrtare të siguruara nga Report TV pranë Inspektoratit të Punës përgjatë 11-muajve vetëm në sektorin e ndërtimit si rezultat i aksidenteve kanë humbur jetën 15 persona, duke trefishuar kështu numrin e personave që kanë humbur jetën nga viti 2018, ku u konstatuan vetëm 5 raste të humbjes së jetës në punë. Në 11 muaj janë regjistruar të aksidentuar në sektorin e ndërtimit 42 punonjës.<br /><br />Më pas në renditjen e aksidenteve vjen puna në miniera ku në 11 muaj kanë humbur jetën 7 persona si pasojë e aksidenteve në punë. Ndërkohë në sektorin e ndërmarrjeve prodhuese dhe fasoneri aksidentet kanë pasur pasoja fatale për 2 punonjës, ndërsa janë aksidentuar në total 35 punëmarrës.<br /><br />Këto shifra tregojnë për një rritje të rasteve të aksidenteve në punë. Gjatë periudhës janar-nëntor 2019 janë kryer 176 inspektime për shkak aksidenti në punë dhe janë konfirmuar si të aksidentuar 157 punëmarrës. Në vend të parë për numrin e lartë të aksidenteve renditet Tirana me 46 punëmarrës te aksidentuar, më pas vijnë Durrësi me 20, Dibra me 18 dhe Elbasani me 16 punëmarrës.<br /><br />Përveç aksidenteve rezulton se është shtuar edhe informaliteti, pasi nga inspektimet janë konstatuar gjithsej 2806 punëmarrës që janë të pasiguruar, ku minimumi i kostos së munguar në arkën e shtetit për sigurim shoqëror e shëndetësor për një muaj, për këta punëmarrës, në 20.3 milion lekë. Kjo shifër e informalitetit është katërfishuar krahasuar me vitin 2017, ku numri i personave të pasiguruar ishte 607.<br /><br />Edhe ky vit ka filluar me aksidente. Rasti i fundit ishte ai i Korçës ku si pasojë e një aksidenti në punë humbi jetën Elvis Josifi, 36 vjeçar dhe u plagos shoku i tij punëtor, që u pasua me dy minatorë të plagosur në Bulqizë.
