Pas kthimit nga Ukraina si drejtues i Presidencës së OSBE-së, kryeministri i Shqipërisë Edi Rama sot po zhvillon një vizitë zyrtare në Itali, ku do të takohet me homologun Giuseppe Conte.<br /><br />Dy nga çështjet kryesore që pritet që të diskutohen në takimin mes Ramës dhe Contes janë çelja e negociatave me shpresën se liderët e BE-së do të marrin një vendim në pranverë dhe pika tjetër lidhet me konferencën e donatorëve që do të mbahet në shkurt. Pikërisht për këtë cështje, kryeministri shqiptar është takuar dhe ka diskutuar edhe me ministrin e Jashtëm italian. <br /><br />Kreu i qeverisë shqiptare videon e takimit e ka publikuar në faqen e tij në Facebook, ndërsa nga komunikimi me Di Maion në momentin e pritjes dhe ecjes në korridor deri kur ulen në tryezën e takimit me delegacionet përkatëse, Shqiptarja.com ka zbardhur bisedën mes tyre.<br /><br />Rama dëgjohet teksa i thotë se fatura e tërmetit arrin në një miliard Euro, ndërsa Di Maio i jep besim se do të gjendet një zgjidhje në Konferencën e Donatorëve. Kjo është hera e tretë që Rama dhe Conte takohen në pak muaj. Vizita e Contes në Shqipëri në tetor u pasua nga e kryeministrit Rama në Itali, po vitin e kaluar, ndërsa sot do të kenë një tjetër takim në Romë.
