Rreth 200 fëmijë në 24 orë paraqiten në Pediatrinë e Spitalit të Durrësit për shkak të virozave të stinës. Pediatria Xhevi Shkreli thotë se grupmosha më e prekur është 0 deri në 12 vjeç, ndërkohë mjekja këshillon prindërit që të shmangin kontaktet e fëmijëve me persona të cilat kanë kaluar një gjendje gripale.<br /><br />"Në këtë periudhë kemi gjendje gripale, ku fëmijët paraqiten me simptomat karakteristike të gripit, me temperaturë të lartë deri në 41. Kjo periudhë ka qenë e ngarkuar, kishte ditë që shkonte në 200 pacientë. Nënat duhet të shmangin kontaktin e fëmijëve me fëmijë që kanë kaluar gjendje gripale ose të afërm të sëmurë", tha pediatria Xhevi Shkreli.<br /><br />Ndryshimi i temperaturave përgjatë këtyre ditëve ka sjellë dhe fluksin e vizitave në pediatrinë e Durrësit, por në kushtet kur kjo godinë po rikonstruktohet, mjekja Shkreli thotë se kjo ka sjellë vështirësi për të menaxhuar fluksin e pacientëve.<br /><br />"Dhe shtrime ka pasur shumë por në kushtet kur spitali po rregullohet jemi futur në vështirësi, sepse i kemi mbajtur fëmijët derisa të përmirësohen", tha mjekja<br /><br />Mjekja pediatre këshillon prindërit që të monitorojnë temperaturën e fëmijëve si dhe t'iu japin sa më shumë lëngje.
