Rastet e dyshuara me koronavirus në Shqipëri kanë rezultuar negative deri më tani. Nga mijëra persona të monitoruar, dyshimet ishin për vetëm 8 persona, asnjë prej të cilëve nuk rezultoi pozitiv.<br /><br />Të frikësuar nga infektimi me koronavirus, shumë njerëz në kryeqytet kanë zgjedhur të mbajnë maska edhe në rrugë, por për specialistët kjo nuk është e nevojshme.<br /><br />Në të gjitha pikat kufitare tokësore, ajrore dhe detare vijon kontrolli i pasagjerëve. Në Morinë, mjekët kanë regjistruar çdo udhëtarë që vjen nga zona të infektuara, proces që shërben për gjurmimin e rastit. Në Portin e Durrësit, mbi 500 persona kanë mbërritur nga Italia me dy tragete. Të gjithë i janë nënshtruar kontrollit.<br /><br />Udhëtarët thonë se të njëjtin filtër e kanë kaluar edhe në shtetin fqinj, Italinë, përpara se të kalonin kufirin, ndaj nuk janë të frikësuar. Deri tani nuk është evidentuar asnjë rast i dyshuar, si i prekur me koronavirus.<br /><br />Tv Klan
