Koronavirusi ka shënuar 2 viktima të tjera në Itali duke e çuar në 14 numrin e tyre. Zyrtarët italianë të shëndetësisë thanë se sërish bëhet fjalë për të moshuar, me probleme shëndetësore të mëparshme. Të dhënat më të fundit tregojnë se edhe numri i të prekurve është rritur, duke shkuar tashmë në 528. Masat vijojnë të jenë të rrepta dhe kontrollet janë shtuar.<br /><br />Nga Italia ka edhe lajme të mira. 42 persona janë shëruar plotësisht nga virusi. E shëruara e parë nga ky virus është një 47-vjeçare nga rajoni i Venetos, e cila tha për të përditshmen Corriere della Sera se kishte marrë vetëm një ilaç për dhimbje koke dhe asgjë më shumë. Nuk kishte pasur temperature dhe mjekët e kishin këshilluar të merrte antigrip të zakonshëm në shtëpi. <br /><br />Autoritetet lokale në Milano thanë se së shpejti do t?i jepet fund gjendjes së jashtëzakonshme dhe se do të hapen gradualisht institucionet publike, teatrot, muzetë e shkollat.<br /><br />Italianët gjithsesi janë shkaktarë të përhapjes së koronavirusit në disa vende europiane. Në Rumani është konstatuar i infektuari i parë, një person i cili kishte shoqëruar një 71-vjeçar të infektuar nga Rimini, i cili kishte vizituar vendin për gjueti. Ka arritur në 3 numri i të infektuarve edhe në Greqi, të gjithë të kthyer nga udhëtimet në Itali gjatë ditëve të fundit.<br /><br />Arabia Saudite ka pezulluar për një afat të pacaktuar, hyrjen e të huajve për pelegrinazhin në dy vendet e shenjta të fesë islame, Mekë dhe Medinë.<br /><br />Por një lajm i keq vjen nga Japonia, ku një 40-vjeçar i shëruar nga koronavirusi rezulton të jetë infektuar sërish. Mjekët thonë se rikthimi është normal. Kryeministri Shinzo Abe urdhëroi mbylljen e shkollave dhe institucioneve publike.<br /><br />Në një konferencë të posaçme për shtyp, presidenti amerikan Donald Trump tha se rreziku i koronavirusit për vendin e tij është i ulët. Megjithatë, ai emëroi zëvendësin e tij Mike Pens në krye të një ekipi për kundërpërgjigjen ndaj situatave emergjente.<br /><br />Aktualisht numri i viktimave në të gjithë botën ka arritur në mbi 2800 dhe mbi 82 mijë ai i të infektuarve.<br /><br />Tv Klan
