Të gjitha subjektet të cilat do të përfshihen në procesin e rindërtimit të shtëpive të dëmtuara nga tërmeti i 26 nëntorit do të përjashtohen nga tatimi mbi vlerën e shtuar. <br />Vendimi i miratuar nga Këshilli i Ministrave i hap rrugë nisjes së punimeve për të gjithë ndërtuesit, kontraktorët dhe subjektet që furnizojnë këto firma. <br />Drejtoria e Përgjithshme e Tatimeve sqaron se qëllimi i kësaj nisme është ulja e kostove për buxhetin e rindërtimit si për qeverinë edhe për donatorët. <br />Që të përjashtohesh nga ky tatim, fillimisht duhet që çdo kompani, nënkontraktor ose furnitor që ka lidhur marrëveshje me njësinë zbatuese të procesit të rindërtimit apo Këshillin e Ministrave duhet të marrë një autorizim në drejtorinë e Tatimeve. Që të shmangen abuzimet, kusht është vendosur të dërgohet edhe preventivi i punimeve dhe sasia e mallrave që nevojiten për rindërtimin. <br />Pas paraqitjes së dokumentacionit, drejtori i përgjithshëm i tatimeve ka afat 5 ditë për të dhënë autorizimin për subjektet përfituese. <br />TVSH-ja për materialet e ndërtimit, makineritë dhe shërbimet që nevojiten për ndërtuesit është 20%, në momentin që kjo taksë përjashtohet, vlera e ndërtimit të sipërfaqeve bëhet më e lirë duke stimuluar kështu ndërtimin e sa më shumë banesave.
