شاعر: احمد فراز<br />نعتِ رسولِ مقبول ﷺ<br />مرے رسولﷺ کہ نسبت تجھے اجالوں سے<br />میں تیرا ذکر کروں صبح کے حوالوں سے<br />نہ میری نعت کی محتاج ذات ہے تیری<br />نہ تیری مَدح ہے ممکن مرے خیالوں سے<br />تو روشنی کا پیمبر ہے اور مری تاریخ<br />بھری پڑی ہے شبِ ظلم کی مثالوں سے<br />ترا پیام محبت تھا اور مرے یہاں<br />دل و دماغ ہیں پُر نفرتوں کے جالوں سے<br />یہ افتخار ہے تیرا کہ میرے عرش مقام<br />تُو ہمکلام رہا ہے زمین والوں سے<br />مگر یہ مفتی و واعظ، یہ محتسب، یہ فقیہہ<br />جو معتبر ہیں فقط مصلحت کی چالوں سے<br />خدا کے نام کو بیچیں مگر خدا نہ کرے<br />اثر پذیر ہوں خلقِ خدا کے نالوں سے<br />نہ میری آنکھ میں کاجل نہ مشکبو ہے لباس<br />کہ میرے دل کا ہے رشتہ خراب حالوں سے<br />ہے تُرش رو مری باتوں سے صاحبِ منبر<br />خطیبِ شہر ہے برہم مرے سوالوں سے<br />مرے ضمیر نے قابیل کو نہیں بخشا<br />میں کیسے صلح کروں قتل کرنے والوں سے<br />میں بے بساط سا شاعر ہوں پر کرم تیرا<br />کہ با شرف ہوں قبا ہ کلاہ والوں سے<br />
