Ashtu siç kishte paralajmëruar, Presidenti Ilir Meta shkoi në zyrën elektorale të Partisë Demokratike në Kavajë, aty ku pasditen e kësaj të hëne mbeti i plagosur 27-vjeçari, Bledar Okshtuni. Kreu i shtetit ka paralajmëruar kryeministrin Edi Rama dhe ka thënë që ngjarja që ndodhi sot të jetë “gjaku i fundit për zgjedhjet”.<br /><br />Fajtor për situatën Presidenti bën kryeministrin Edi Rama, ndërsa tha se ai ka “çuar rrugaçët për të hyrë në shtëpinë e PD-së”.<br /><br />“Kam një paralajmërim për kryeministrin e bandave të Shijakut dhe të Dibrës që shkatërruan zgjedhjet e kaluara dhe që na kanë katandisur në këtë situatë. Të jetë gjaku i fundit për zgjedhjet. Ti jo Kushtetutë që nuk njeh, por ti nuk i di as rregullat e shqiptarit se nuk i di rregullat e shqiptarit. Shqiptarit po i hyre në shtëpi të bën atë gjë që nuk ta pret mendja. Ti ke çuar rrugaçët për të hyrë në shtëpinë e PD-së, të opozitës, për t’i dhunuar. Shyqyr Zotit që ka shpëtuar dhe i urojmë të shkuara. I keni çuar banditët tërë natën nëpër Shqipëri. Ca i nxorre nga burgu tërë natën. U ke mbushur mendjen se gjoja do kesh mandatin e tretë. Prandaj thirri mendjes para se të jetë vonë dhe para se të merren vendime historike për të ardhmen e Shqipërisë për 100 vitet që vijnë. Lëri qytetarët që të votojnë të lirë. Boll e shkele Kushtetutën, boll e shkele Kodin. Ti e dhunove marrëveshjen e 5 Qershorit. Ti ke bërë me qindra krime zgjedhore tërë këto ditë. Mos kujto se Kavaja dhe Shqipëria mund të poshtërohen në këtë mënyrë. Je ti që fute politikanët me 5 emra me 10 emra me 100 probleme. Unë zonja Duma ju përshëndes për fushatën tuaj të qetë dhe shumë qytetare dhe vazhdoni në këtë mënyrë. I ftoj qytetarët e Kavajës që të ruajnë qetësinë, të kujdesemi edhe për shëndetin e të plagosurit”.<br /><br />Presidenti pati thirrje për kreun e Policisë së Shtetit ndërsa tha se duhet t’i lerë arsyet se kjo ngjarja ka ndodhur për motive të dobëta, por sepse tashmë “loja është serioze”.<br /><br />“Shpresojmë që policia të ketë ndërhyrë se nuk kam shumë informacione. Ato motivet e dobëta t’i lerë policia. Ardi Veliu lëri motivet e dobëta. Është serioze tani loja, nuk ka shaka dhe mos i lini ata që janë në kërkim të bredhin nëpër Shijak dhe Sukth sepse do ketë veprime spektakolare që nuk u ka vajtur mendja. A ka trima që duan ta prekin, ta provojn! Ka çuna problematikë, po kur të bëhet i gjithë populli problematik së bashku me Presidentin problematik, ku do shkosh ti Edi Rama. Nuk ka vrimë gjëkundi që të nxë ty. Thirri mendjes se jemi bërë faqja e zezë e botës”, tha Meta./tvklan.al
