तुमच्या मुलांना फास्टफूडची सवय लागली असेल, किंवा मॅगीशिवाय दुसरं काही आवडत नसेल तर ही बातमी तुमच्या कामाची आहे. उस्मानाबादमधील महिलांनी असा व्यवसाय सुरू केलाय, ज्यात त्या स्वतःचा उदरनिर्वाह तर भागवत आहेतच, पण लहान मुलं, गरदोर महिला आणि वृद्धांसाठी एक जबरदस्त पर्यायी आहार देत आहेत. उमरगा तालुक्यातील गुंजोटी गावातील महिलांनी एक नव्हे, तर 21 प्रकारच्या पौष्टिकमूल्य असलेल्या शेवया तयार करून विक्री करण्याचा उद्योग सुरु केला आहे. या शेवयांचं वैशिष्ट्य म्हणजे या शेवया भाजीपाल्यापासून तयार केल्या जातात. राष्ट्रीय ग्रामीण आर्थिक परिवर्तन प्रकल्प आणि महाराष्ट्र राज्य ग्रामीण जीवनोन्नती अभियानाच्या माध्यमातून या महिलांना प्रशिक्षण आणि आर्थिक मदत केली जात आहे.
