ఏపీలో పీఆర్సీ రగడ కొనసాగుతోంది. ప్రభుత్వ జీవోవలకు వ్యతిరేకంగా ఉద్యోగులు పిలుపునిచ్చిన చలో విజయవాడతో ఉద్రిక్త పరిస్థితులు కనిపిస్తున్నాయి. ఈ నిరసన కార్యక్రమానికి అనుమతి లేదని పోలీసులు చెబుతుంటే.. ఉద్యోగులు కూడా వెనక్కు తగ్గేది లేదంటున్నారు. పోలీసులు ఎన్ని ఆంక్షలు పెట్టినా ఉద్యోగులు, ఉపాధ్యాయులు మాత్రం విజయవాడ చేరుకుంటున్నారు. విజయవాడలో భారీకేడ్లు ఏర్పాటు చేసి BRTS రోడ్డులో కార్లు, బైక్ల రాకపోకలను నిలిపివేశారు. విజయవాడకు ఎటువంటి అనుమతులు లేవంటూ ఉద్యోగులను ఎక్కడికక్కడ పోలీసులు అరెస్ట్ చేస్తున్నారు. విజయవాడకు వస్తున్న ప్రతి బస్సును, కార్ను, టు వీలర్ను పోలీసులు ఆపి తనిఖీ చేస్తున్నారు. పోలీసులు ఫాల్కన్ వాహనంతో చుట్టుపక్కల పరిస్ధితులను అనుక్షణం పరిశీలిస్తున్నారు. బీఆర్టీఎస్ రోడ్డు చుట్టుపక్కల అన్నివైపులా పికెట్లు ఏర్పాటు చేశారు.
