Fina e lenta<br />Eduardo De Filippo<br />❣️❤️❣️❤️<br />Spaparanze sti llastre 'e stu balcone,<br />ca quanno chiove fino sì cuntento:<br />tu t'arricuorde 'e quann' ire guaglione...<br />ma quanno chiove fino, lento lento.<br />Guaglione, for' a ll'asteco,<br />chi nun s'è mmiso sott' 'a capannella?...<br />"Mammà, me piglio 'e ttàvule d' 'a tàvula<br />e cu ddoje seggie faccio 'a casarella...<br />'A pozzo fa?" "Va buono, pigliatelle.<br />Ma si pò ncasa, e ll'acqua forte scenne,<br />aiza 'e bancarelle e trasetenne".<br />Fermàte ncopp' 'e tìttole,<br />veco na bella cocchia 'e palummielle:<br />'O masculo, cchiù ardito, vas' 'a femmena;<br />chiove fino, ma lloro nun 'o ssenteno,<br />nun 'o pponno sentì pecchè se vàseno...<br />E pò è refrisco ll'acqua ncopp' 'e scelle.<br />S'arapeno 'e ffenest' 'e tutt' 'e ccase,<br />'e balcune cu ll'ellera addirosa,<br />chi tir' 'a biancaria ca steva spasa...<br />E ssaglie chell'addor' 'e terra nfosa.<br />Cumme fa bene st'aria!<br />Pò dà sullievo pure a nu malato.<br />Pè nu ciardino, pò, che refrigerio,<br />ogne sciore addeventa nnargentato!<br />Ma cumm'è triste pe' nu nnammurato<br />stu schezzechìo ca more e ca nun more,<br />percia e te trase nfin' a dint' 'o core.<br />Cumme a chi nun vò chiagnere;<br />cu ll'uocchie fisse e, niente, nun 'e smove<br />pè nun sbuttà. Ma 'e llacreme sò llacreme!<br />Cumme t' 'e può tenè si chelle scòrreno?<br />Ll'uocchie cchiù stanno fisse e cchiù se nfònneno...<br />E' tale e quale quanno lento chiove.<br />Nzerrate, rebbazzate stu balcone!<br />Sta pioggia fina a vuje ve pare bella.<br />Ma j' mò sò gruosso, nun sò cchiù guaglione,<br />cumme m' 'a pozzo fà na casarella?<br />Manco cu segge e ttàvule...<br />E pure me dispiace si fernesce...<br />Nu' mporta... Ce staranno quatte nuvole,<br />però na lenza 'e sole trase e gghiesce!<br /> Scritta da Eduardo De Filippo<br />
