'O quadro <br />Giovanna Balsamo<br /><br />Tiene mente quanta culure tene 'a natura:<br />pare nu quadro pittato 'a nu grann'artista.<br />Ogni stagione fa na mostra 'e cose bbelle, <br />e tte fa mmirà paisagge c'allereano 'a vista. <br />'Int'a nniente te culora na stradulella:<br />'a regne cu ttanta fuglietelle ggialle e rrosse.<br />Mponta â via nce mette na vulpella,<br />ca zumpettea mmiez'a mmiĺle foglie smosse. <br />Cu cciento e cchiù pennielle variopinte,<br />appripara na tavolozza fatta a mmestiere:<br />ncoppa nce mette tanta bbelli ttinte,<br />pe ppittà viale, bosche, sciardine e ssentiere. <br />Ncielo disegna na nuvula nera e una janca,<br />ca salutano nu stormo d'aucielle migrante.<br />Nterra ce mette nu tappeto 'e foglie secche,<br />ca scricchiuleano sott'ê piede d' 'e passante. <br />'Stu brav'artista a ogni ccagno 'e stagione,<br />nun tene chissà quale granna ambizione:<br />vo' sulamente culurà frutta, fiore 'e sciure,<br />pe ccunzignà ll'opera d'arte mman'â natura. <br />Pe ffa' quadre d'autore accussì pperfette,<br />nce vonno tanta passione e ll'aiuto 'e Ddio.<br />'Stu paraviso è 'a terra...e nun se maldratta:<br />i' 'a porto rispetto...pecché è 'a casa mia.<br />Giovanna Balsamo
