Eduardo de Filippo - Ca si fosse...<br /><br />Eduardo de Filippo ‘O CANISTO<br />Edizioni Teatro San Ferdinando 1971<br /><br />Lettura di Luigi Maria Corsanico<br /><br />______________________________<br /><br />Ca si fosse… (1959)<br /><br />Sta tutto scritto<br />sta tutto signato.<br />Chi pe’ na mano<br />chi pe’ n’ata mano…<br />Chello pe’ cchesto<br />e chesto pe’ chell’ato…<br />Sta tutto scritto<br />sta tutto signato.<br />Ma addò sta scritto?<br />Addò vene signata<br />na sorta trista<br />ca te nchiova ncroce?<br />E chi è stu nfamo,<br />st’anema dannata<br />ca segna e scrive<br />dint’a chistu libro<br />e ca dice:<br />«Mò tu!»,<br />«Tu no!»,<br />«Tu sì!»?<br />Nun se trova na pagina caduta,<br />vulata all’intrasatta<br />‘a dint’ ‘o libro:<br />nu fuglietto,<br />n’appunto…<br />nun se trova nè pe’ ll’aria<br />nè nterra.<br />Ca si fosse…<br />ca na pagina sola se truvasse,<br />cu n’appunto signato,<br />na parola,<br />se putesse<br />cu certezza sape’<br />qual’è ‘a mano ca scrive,<br />e se sapesse<br />si scrive cu nu scopo<br />na ragione<br />o pe’ sfizio sultanto<br />o sulamente pe’ malvagità…<br />Addò sta scritta<br />addò vene signata<br />na sorta trista<br />ca te nchiova ncroce?<br />E addò se mette ‘a sciorta<br />pe’ nun se fa’ vede’<br />primmo d’ ‘o tiempo,<br />primmo d’ ‘o juorno<br />ll’ora<br />e d’ ‘o mumento<br />ca t’addà zumpà ncuollo<br />a tradimento?<br />Se mette dint’ a voce,<br />mmiez’ ‘e pparole toie,<br />sott’ ‘e penziere,<br />se mmesca mmiez’ ‘e mmosse ca tu faie,<br />dint’ ‘e resate ‘e quanno si’ felice…<br />e quanno s’annasconne<br />nun t’ ‘o dice.
