Intro:Body:বনৰজাৰ বাহাদুৰি! এজাঁপতে আঁজুৰি আনিলে চিকাৰ। পলকতে দেখুৱালে ঝলক। আপোনমনে ঘাঁহ খাই থকা এজাক হৰিণাৰ মাজৰ পৰা তড়িৎ গতিৰে থপিয়াই আনিলে এটা হৰিণা পোৱালি। মুখত চিকাৰ লৈ পানী ফালি সদম্ভে আগবাঢ়িল ঢেঁকীয়াপতীয়া। দৃশ্যটো কাজিৰঙাৰ। ৰাষ্ট্ৰীয় উদ্যানখনৰ কহঁৰা বনাঞ্চলৰ কাঠপাৰাত বনৰজা দৰ্শনৰ বাবে আগ্ৰহেৰে অপেক্ষাত থকা পৰ্যটকৰ সমুখত বনৰজাই দেখা দিলে এই বিশেষ ভংগীমাৰে। প্ৰায় দহ মিনিট ধৰি ঢেঁকীয়াপতীয়া বাঘে এইদৰে চিকাৰ ধৰাৰ লগতে গহীন গমনেৰে সন্মোহিত কৰিলে পৰ্যটকক। সমগ্ৰ দৃশ্যটো বন্দী হ'ল কেমেৰাত। টুৰিষ্ট গাইড শিশুকান্ত নাথৰ কেমেৰাত বন্দী হোৱা এই বিৰল দৃশ্যৰ প্ৰত্যক্ষদৰ্শী হ'ল চেন্নাইৰ পৰা কাজিৰঙা দৰ্শনৰ বাবে আগমন ঘটা এটা পৰ্যটকৰ দল। বানৰজাৰ চিকাৰ কৰা আৰু গম্ভীৰ গমন প্ৰত্যক্ষ কৰি আপ্লুত হ'ল সকলো। শেহতীয়াকৈ কাজিৰঙাত ঢেঁকীয়াপতীয়া বাঘ সণ্ঢালনিকৈ প্ৰত্যক্ষ হোৱাত পৰ্যটকসকল অধিক আকৰ্ষিত হৈছে। সুন্দৰবন, ৰণথাম্বৰ আদি টাইগাৰ ৰিজাৰ্ভ আদিত বাঘ নেদেখি বিফল মনোৰথ হোৱা পৰ্যটকসকল কাজিৰঙালৈ আহি শুকুৰবাৰে সাক্ষী হ’ল কাজিৰঙাত বাঘ বিচৰণৰ বিশেষ মুহূৰ্তৰ। উল্লেখ্য যে কিছুদিন পূৰ্বে একেজন টুৰিষ্ট গাইড শিশুকান্ত নাথৰ কেমেৰাত একে স্থানতে বন্দী হৈছিল এজনী বাঘিনীৰ সৈতে তিনিটা পোৱালি। পোৱালিকেইটাৰ মাজত এটা সোণালী পোৱালি থকাৰ কথা উল্লেখ কৰিছে টুৰিষ্ট গাইডজনে। সম্ভৱতঃ উক্ত পোৱালি তিনিটাৰ আহাৰৰ বাবেই আজি হৰিণা পোৱালিটো চিকাৰ হ’ল বাঘিনীজনীৰ।ধ্ৰুৱজ্যোতি সাহাকাজিৰঙা৷ ১৭/১/২০২৫Conclusion:
