(Bal-e-Jibril-129) <br />Ae Anfus-o-Afaq Mein Paida Tere Ayaat<br />Haq Ye Hai Ke Hai Zinda-o-Paenda Teri Zaat<br /><br />Main Kaise Samajhta Ke Tu Hai Ya Ke Nahin Hai<br />Har Dam Mutaghyyar The Khird Ke Nazariyat<br /><br />Mehram Nahin Fitrat Ke Sarood-e-Azali Se<br />Beenaye Kawakib Ho Ke Dana’ay Nabataat<br /><br />Aj Ankh Ne Dekha To Woh Alam Huwa Sabit<br />Main Jis Ko Samajhta Tha Kalisa Ke Khurafat<br /><br />Hum Band-e-Shab-o-Roz Mein Jakre Huwe Bande<br />Tu Khaliq-e-Aasaar-o-Nigarindah’ay Aanat!<br /><br />Ek Baat Agar Mujh Ko Ijazat Ho To Puchun<br />Hal Kar Na Sake Jis Ko Hakeemon Ke Maqalat<br /><br />Jab Tak Mein Jiya Khaima-e-Aflak Ke Neeche<br />Kante Ki Tarah Dil Mein Khatakti Rahi Ye Baat<br /><br />Guftar Ke Asloob Pe Qaboo Nahin Rehta<br />Jab Rooh Ke Andar Mutaltum Hon Khayalat<br /><br />Woh Kon Sa Adam Hai Ke Tu Jis Ka Maabood<br />Woh Adam-e-Khaki Ke Jo Hai Zair-e-Samawat?<br /><br />Mashriq Ke Khudawand Saifedan-e-Farangi<br />Maghrib Ke Khudawand Darakhshandah Filzaat<br /><br />Yourap Mein Bohat Roshani-e-Ilm-o-Hunar Hai<br />Haq Ye Hai Ke Be-Chashma’ay Haiwan Hai Ye Zulmat<br /><br />Raanayi-e-Tameer Mein, Ronaq Mein, Safa Mein<br />Girjon Se Kahin Barh Ke Hain Bankon Ki Amarat<br /><br />Zahir Mein Tajarat Hai, Haqiqat Mein Juwa Hai<br />Sood Aik Ka Lakhon Ke Liye Marg-e-Mafajat<br /><br />Ye Ilm, Ye Hikmat, Ye Tadabur, Ye Hukumat<br />Peete Hain Lahoo, Dete Hain Taleem-e-Masawat<br /><br />Bekari-o-Uryani-o-Maikhawari-o-Iflaas<br />Kya Kaam Hain Farangi Madniyat Ke Fatuhaat<br /><br />Woh Qoum Ke Faizan-e-Samawi Se Ho Mehroom<br />Had Uss Ke Kamalaat Ki Hai Barq-o-Bukharaat<br /><br />Hai Dil Ke Liye Mout Machinon Ki Hukumat<br />Ehsas-e-Marawwat Ko Kuchal Dete Hain Aalaat<br /><br />Asaar To Kuch Kuch Nazar Ate Hain Ke Akhir<br />Tadbeer Ko Taqdeer Ke Shatar Ne Kiya Maat<br /><br />Maikhane Ki Bunyad Mein Aya Hai Tazalzul<br />Baithe Hain Issi Fikar Mein Peeran-e-Kharabat<br /><br />Chehron Pe Jo Surkhi Nazar Ati Hai Sar-e-Shaam<br />Ya Ghazah Hai Ya Saghir-o-Meena Ki Karamat<br /><br />Tu Qadir-o-Adil Hai Magar Tere Jahan Mein<br />Hain Talakh Bohat Banda’ay Mazdoor Ke Auqat<br /><br />Kab Doobe Ga Sarmaya Prasti Ka Safina?<br />Dunya Hai Teri Muntazir-e-Roz-e-Makafat!<br /><br />#Iqbaliyat #LaborDay #Lenin #Revolution #labourday #Iqbal #Poetry #Urdu<br />#vladimirlenin #Communist #Communism <br />
