کشمیر، برفباری اور بارش سے معمولات زندگی مفلوج

<p>سرینگر: کشمیر میں ہفتے کو بالائی علاقوں میں تازہ برفباری ریکارڈ کی گئی جبکہ نشیبی علاقوں میں موسلا دھار بارشوں سے عام زندگی مفلوج ہو کر رہ گئی۔</p><p>شمالی کشمیر کے رازدان ٹاپ اور مغل روڈ پر پیر کی گلی میں برفباری کے باعث گریز-بانڈی پورہ اور پونچھ-راجوری-شوپیاں سڑکوں کو بند کر دیا گیا ہے۔  </p><p>سرینگر لیہہ شاہراہ پر بھی زوجیلا پاس پر برفباری کے بعد ٹریفک کو احتیاطاً روک دیا گیا ہے۔</p><p>صوبہ جموں کے رام بن میں ژالہ باری اور تیز بارشوں سے معمولات زندگی درہم برہم ہو گئی ہے، تاہم سرینگر جموں قومی شاہراہ پر ٹریفک کی نقل و حمل جاری ہے۔ جبکہ محکمہ نے ڈرائیوروں سے احتیاط برتنے کی اپیل کی ہے۔</p><p>محکمہ موسمیات نے مزید بارش، تیز ہواؤں اور بعض مقامات پر ژالہ باری کی پیش گوئی کرتے ہوئے لینڈ سلائیڈنگ اور فلیش فلڈز کا خدشہ بھی ظاہر کیا ہے۔</p>