ബേപ്പൂരിൽ മത്സ്യബന്ധന ബോട്ട് മറിഞ്ഞു; കടലിൽ വീണവരെ സാഹസികമായി രക്ഷപ്പെടുത്തുന്ന ദൃശ്യങ്ങള്‍

<p>കോഴിക്കോട്: ബേപ്പൂരിൽ നിന്ന് മത്സ്യബന്ധനത്തിന് കടലിൽ പോവുകയായിരുന്ന ഫൈബർ വള്ളം മറിഞ്ഞു. ഇന്ന് രാവിലെയാണ് സംഭവം. ബേപ്പൂർ അഴിമുഖത്തിന് അടുത്തുവച്ചായിരുന്നു അപകടം ഉണ്ടായത്. ഈ സമയം കടലിൽ ശക്തമായ കാറ്റും തിരമാലയും ഉണ്ടായിരുന്നു. </p><p>ഇതിൽ പെട്ടാണ് ഫൈബർ വള്ളം മറിഞ്ഞത്. വള്ളം മറിയുമ്പോൾ അഞ്ച് മത്സ്യത്തൊഴിലാളികളാണ് വള്ളത്തിൽ ഉണ്ടായിരുന്നത്. അപകടം നടന്ന ഉടൻ തന്നെ പരിസരത്തുണ്ടായിരുന്ന മറ്റു ബോട്ടുകളിലെ മത്സ്യത്തൊഴിലാളികൾ ഇവരുടെ അടുത്തേക്ക് കുതിച്ചെത്തുകയും കടലിൽ വീണവരെ അതിസാഹസികമായി രക്ഷപ്പെടുത്തുകയും ചെയ്‌തു. </p><p>ഏറെ നേരത്തെ പരിശ്രമത്തിനു ശേഷമാണ് ഇവരെ അഞ്ചു പേരെയും കരക്കെത്തിച്ചത്. അഞ്ചു പേർക്കും നിസാര പരിക്കുകളുണ്ട്. കനത്ത മഴ തുടരുന്ന സാഹചര്യത്തിൽ കടലിൽ ശക്തമായ തിരമാലകൾ രൂപപ്പെടുന്നുണ്ട്.<br>ഇത് കണക്കിലെടുക്കാതെ മത്സ്യത്തൊഴിലാളികൾ ചെറുവള്ളങ്ങളിലും ബോട്ടുകളിലും കടലിലേക്ക് പോയതാണ് അപകടകാരണമെന്ന് കോസ്‌റ്റൽ പൊലീസ് അറിയിച്ചു. </p><p>മറ്റ് മത്സ്യത്തൊഴിലാളികളുടെ അവസരോചിതമായ ഇടപെടലാണ് രക്ഷയായതെന്ന് പൊലീസ്‌ പറഞ്ഞു. ഇവരുടെ കൃത്യ സമയത്തുള്ള പ്രവർത്തനമാണ് ബോട്ട് മറിഞ്ഞ് കടലിൽ അകപ്പെട്ട അഞ്ച് മത്സ്യത്തൊഴിലാളികളുടെയും ജീവൻ രക്ഷിക്കാൻ കാരണമായതെന്നും കൂട്ടിച്ചേർത്തു.  </p>