<p>കോട്ടയം: കോട്ടയത്തെ ചന്തക്കവലയിൽ ഇറങ്ങി ജനങ്ങളെ അഭിവാദ്യം ചെയ്‌ത് രാഷ്ട്രപതി മടങ്ങി. കുമരകം സന്ദർശനത്തിന് ശേഷം മടക്കയാത്രയിലാണ് കുമരകത്തെ പ്രധാന ജംഗ്‌ഷനായ ചന്തക്കവലയിൽ ഇറങ്ങി തന്നെ കാണാൻ കാത്തുനിന്ന പൊതുജനങ്ങളെ അഭിവാദ്യം ചെയ്‌തത്. വഴിയരികില്‍ കാത്തു നിന്ന കുട്ടികള്‍ക്ക് ചോക്ക്ലേറ്റ് സമ്മാനിച്ചാണ് പ്രഥമ വനിത ഏവരേയും അമ്പരപ്പിച്ചത്. ചന്തക്കവലയിലെ നാട്ടുകാര്‍ക്കും കച്ചവടക്കാര്‍ക്കുമൊക്കെ ഇതൊരു പുതിയൊരനുഭവമായിരുന്നു.</p><p>ഒരു ദിവസത്തെ സന്ദർശനത്തിന് ശേഷം രാഷ്ട്രപതി ദ്രൗപതി മുർമു അക്ഷര നഗരിയോട് യാത്ര പറഞ്ഞു. ഹൃസ്വ സമയത്തേക്കുള്ള സന്ദർശനമായിരുന്നെങ്കിലും കോട്ടയത്തിൻ്റെ തനിമയും, കായൽ ഭംഗിയുമെല്ലാം ആവോളമാസ്വദിച്ച ശേഷമാണ് രാഷ്ട്രപതി കൊച്ചിലേക്ക് യാത്രയായത്.</p><p>വ്യാഴാവ്‌ച കുമരകം താജ് ഹോട്ടലിലാണ് രാഷ്ട്രപതി രാത്രി തങ്ങിയത്. വെള്ളിയാഴ്‌ച രാവിലെ കുമരകത്തിൻ്റെയും, കായലിൻ്റെയും ഭംഗി ആസ്വദിക്കുവാൻ രാഷ്ട്രപതി സമയം കണ്ടെത്തി. രാവിലെ 10 ഓടെ താജ് ഹോട്ടലിൽ നിന്നു കോട്ടയത്തേക്കുള്ള കാർ യാത്രയ്ക്കിടെ രാഷ്ട്രപതി ദ്രൗപദി മുർമു കുമരകം ചന്തക്കവലയിൽ ഇറങ്ങി. രാഷ്ട്രപതിയുടെ വാഹനവ്യൂഹം വെള്ളിയാഴ്‌ച കടന്നുപോകുന്നതിനു മുൻപായി വൻജനകൂട്ടം റോഡിൻ്റെ ഇരുവശങ്ങളിലും സ്‌ഥാനം പിടിച്ചിരുന്നു. </p><p>ഇതിനിടെയാണ് രാഷ്ട്രപതിയുടെ വാഹനവ്യൂഹം കുമരകം ചന്തക്കവലയിലേക്ക് വന്നത്. കാണാൻ കാത്തുനിന്നവരെ നിരാശപ്പെടുത്താതെ രാഷ്ട്രപതി കാറിൽനിന്നിറങ്ങി വരികയായിരുന്നു. ഇല്ലിക്കൽ കവലയിൽ നിന്നിരുന്ന സ്‌കൂൾ കുട്ടികൾക്ക് ചോക്ലേറ്റ് വിതരണം ചെയ്യാനും രാഷ്ട്രപതി സമയം കണ്ടെത്തി. തുടർന്ന് കോട്ടയം പൊലീസ് പരേഡ് ഗ്രൗണ്ടിൽ നിന്നും കൊച്ചിക്ക് യാത്രയായി.</p>
