<p>காஞ்சிபுரம்: தமிழுக்காகவும் தமிழினத்திற்காகவும் நாட்டுப்புற கலைஞர்களை ஊக்குவிக்கும் வகையில் தான் அவர்களுடன் இணைந்து தவெக தலைவர் விஜய் ஆடினார் என அக்கட்சியின் துணை பொதுச் செயலர் ராஜ்மோகன் தெரிவித்தார்.</p><p>காஞ்சிபுரம் மாவட்டம் வாலாஜாபாத் பேருந்து நிலையத்தில் தமிழக வெற்றி கழகத்தின் மூன்றாவது ஆண்டு துவக்க விழா பொதுக்கூட்டம் நடைபெற்றது. இதில் கலந்து கொண்ட அக்கட்சியின் துணை பொதுச் செயலர் ராஜ்மோகன் தையல் இயந்திரம், இஸ்திரிப்பட்டி உள்ளிட்ட பல்வேறு நலத்திட்ட உதவிகளை வழங்கினார்.</p><p>நிகழ்ச்சிக்குப் பின் செய்தியாளர்களைச் சந்தித்த ராஜ்மோகன், 'தமிழுக்காகவும் தமிழினத்திற்காகவும் நாட்டுப்புற கலைஞர்களை ஊக்குவிக்கும் வகையில் நடிகர் விஜய் ஆடினார்' என்றார். </p><p>அதே போல், முன்னாள் அமைச்சர் திண்டுக்கல் சீனிவாசன் 'விதவிதமாய் வித்தியாசமாய்' என விளம்பரத்தை போல நகைச்சுவையாகப் பேசுவார். அதை பெரிதாக எடுத்துக் கொள்ளத் தேவையில்லை என தெரிவித்தார். </p><p>மேலும், காங்கிரஸ் உடன் தமிழக வெற்றி கழகம் கூட்டணி அமைக்குமா என்று கேட்டதற்கு பதில் அளித்த அவர், "காங்கிரஸ் கூட்டணி குறித்து அவர்கள் தான் முடிவு எடுக்க வேண்டும்" என்றார்.</p>
