<p>ವಿಜಯನಗರ(ಬಳ್ಳಾರಿ): ಡ್ರೋನ್ಗಳಲ್ಲಿ ವಿಜಯನಗರ ಸಾಮ್ರಾಜ್ಯದ ವೈಭವ ಕಂಡು ಸಾವಿರಾರು ಜನರು ನಿಬ್ಬೆರಗಾದರು. ಬಹುತೇಕರ ಮೊಬೈಲ್ಗಳು ಆಗಸದತ್ತ ಮುಖ ಮಾಡಿದ್ದವು. </p><p>'ಹಂಪಿ ಉತ್ಸವ'ದ 39 ವರ್ಷಗಳ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಶನಿವಾರ ರಾತ್ರಿ ಆಕರ್ಷಕ ಡ್ರೋನ್ ಶೋ ಆಯೋಜಿಸಲಾಗಿತ್ತು. </p><p>ದೆಹಲಿಯ ಎಐಆರ್ ಪಿಕ್ಸಲ್ ಕಂಪನಿಯ ತಂತ್ರಜ್ಞರು ಸುಮಾರು 1,000 ಡ್ರೋನ್ಗಳನ್ನು ಎಂ.ಪಿ.ಪ್ರಕಾಶ್ ವೇದಿಕೆಯ ಪಕ್ಕದಲ್ಲಿ ಅಳವಡಿಸಿದ್ದರು. ರಾತ್ರಿ 9.30ಕ್ಕೆ ಶೋ ಆರಂಭವಾಯಿತು. ಆಗಸದಲ್ಲಿ ಡ್ರೋಣ್ಗಳು ಚಿತ್ತಾರ ಬಿಡಿಸುತ್ತಿದ್ದಂತೆ ಜನರ ಹರ್ಷೋದ್ಗಾರ ಮುಗಿಲು ಮಟ್ಟುವಂತಿತ್ತು.</p><p>ಡ್ರೋನ್ಗಳು ಮೊದಲು ಕನ್ನಡ ನಾಡನ್ನು ಮೂಡಿಸಿದವು. ಬಳಿಕ ವಿಜಯನಗರ ಸಾಮ್ರಾಜ್ಯದ ವೈಭವದ ಕಥೆ ಹೇಳುವ ವಿವಿಧ ದೃಶ್ಯಗಳನ್ನು ಅರಳಿಸಿದವು. ಹಂಪಿಯ ಪ್ರಸಿದ್ಧ ಕಲ್ಲಿನ ರಥ, ಭವ್ಯ ವಿರೂಪಾಕ್ಷ ದೇವಾಲಯ ಮತ್ತು ಉಗ್ರ ನರಸಿಂಹನ ಮೂರ್ತಿಗಳನ್ನು ಪ್ರದರ್ಶಿಸಿದವು.</p><p>ವಿಜಯನಗರ ಸಾಮ್ರಾಜ್ಯವನ್ನು ಜಗತ್ತಿಗೆ ಪರಿಚಯಿಸಿದ ಸಾಮ್ರಾಟ ಶ್ರೀ ಕೃಷ್ಣದೇವರಾಯರ ಭಾವಚಿತ್ರ ಮೂಡಿಬಂದಾಗ ಜನರಿಂದ ಜೈಕಾರ ಮೊಳಗಿತು.</p><p>ಪ್ರವಾಸಿಗರ ಆಕರ್ಷಣೆಯ ಕೇಂದ್ರ ಹಂಪಿಯ ದರೋಜಿ ಕರಡಿ ಧಾಮ ಮತ್ತು ಬಡವಿ ಲಿಂಗದ ಚಿತ್ರಣಗಳೂ ಪ್ರದರ್ಶನದ ಮೆರುಗು ಹೆಚ್ಚಿಸಿದವು. </p><p>ರಾಜ್ಯ ಸರ್ಕಾರದ ಜನಪ್ರಿಯ ಗ್ಯಾರಂಟಿ ಯೋಜನೆಗಳಾದ ಶಕ್ತಿ ಮತ್ತು ಅನ್ನಭಾಗ್ಯ ಸೇರಿದಂತೆ ಪಂಚ ಯೋಜನೆಗಳ ಕುರಿತ ಮಾಹಿತಿಯನ್ನೂ ಶೋದಲ್ಲಿ ಪ್ರದರ್ಶಿಸಲಾಯಿತು. </p><p>ಇದನ್ನೂ ಓದಿ: ಮಹಾ ಶಿವರಾತ್ರಿ: ಮೈಸೂರಿನಲ್ಲಿ 12 ಜ್ಯೋತಿರ್ಲಿಂಗಗಳ ದರ್ಶನ - ವಿಡಿಯೋ - 12 JYOTIRLINGA DARSHANA</a></p>
