<p>தஞ்சாவூர்: மகா சிவராத்திரியை முன்னிட்டு 24 மணி நேரம் பக்தி நடனமாடி உலக சாதனை புரியும் நிகழ்வு இன்று காலை முதல் தொடர்ந்து நடைபெற்று வருகிறது.</p><p>கும்பகோணம் அபிநயாஸ் கலை குழுமம் தொடர்ந்து 15 ஆண்டுகளுக்கும் மேலாக கும்பகோணம் மாநகரில் உள்ள குழந்தைகளுக்கும், பெரியவர்களுக்கும் நடனம் பயிற்றுவித்து வருகிறார்கள்.</p><p>இதுவரை கிருஷ்ணன், பெருமாள், கிராமிய நாட்டுப்புற பாடல்களில் தொடர்ந்து நடனமாடி 4 உலக சாதனைகள் இந்த அமைப்பினர் புரிந்துள்ளனர். இந்நிலையில், இன்று மகா சிவராத்திரியை முன்னிட்டு இவர்கள் இன்று 5வது உலக சாதனை படைக்கும் பொருட்டு, 24 மணி நேரம் பக்தி நடனமாடும் நிகழ்ச்சியை இன்று காலை தொடங்கியுள்ளனர்.</p><p>இந்த நிகழ்வில், இலங்கை, கர்நாடகா, ஆந்திரா, கேரளா மற்றும் தமிழகத்தின் பல்வேறு பாகங்களில் இருந்து நடன பயிற்சி பெறும் 3 வயது முதல் 58 வயது வரையிலான மாணவ, மாணவியர்கள் கலந்துகொண்டுள்ளனர் அனைவருமே சிவபெருமான் வேடம் புனைந்து தொடர்ந்து 24 மணி நேரம் நடனமாடி சாதனை புரிய திட்டமிட்டிருந்தனர். </p><p>அதன்படி இன்று காலை 6 மணி முதல் நடன நிகழ்ச்சி தொடர்ந்து இடைவேளையின்றி தனிநபர், குழு நடனம் என நடைபெற்று வருகிறது. நாளை காலை 6 மணி வரை நடைபெறும் இத்தொடர் நடன நிகழ்வில் மொத்தம் 480 பேர் பங்கேற்று நடனம் புரிகின்றனர். இந்த சாதனை நிகழ்வு ராயல் புக் ஆப் வேல்டு ரிக்காட்ஸ் இன்டர்நேஷனலில் இடம் பெறுகிறது என்பது குறிப்பிடத்தக்கது.</p>
