<p>ಚಿಕ್ಕಮಗಳೂರು: ಚಿಕ್ಕಮಗಳೂರು ಜಿಲ್ಲೆಯ ಮೂಡಿಗೆರೆ ತಾಲೂಕಿನಲ್ಲಿ ಕಾಡಾನೆಗಳ ಹಾವಳಿ ಮತ್ತೆ ಪ್ರಾರಂಭವಾಗಿದೆ. ಕಾಡಾನೆ ಭೀಮನ ಈ ತಂಡದಲ್ಲಿ ಬರೋಬ್ಬರಿ 45 ಕಾಡಾನೆಗಳು ಹೆಜ್ಜೆ ಹಾಕುತ್ತಿದ್ದು, ಮೂಡಿಗೆರೆಯಲ್ಲಿ ರಸ್ತೆ ದಾಟುತ್ತಿರುವ ದೃಶ್ಯ ಸೆರೆ ಹಿಡಿಯಲಾಗಿದೆ.</p><p>ಅತಿ ಹೆಚ್ಚಾಗಿ ಮರಿ ಆನೆಗಳೇ ಕಾಣಿಸಿಕೊಳ್ಳುತ್ತಿದ್ದು, ತಾಯಿ ಆನೆಗಳು ಅವುಗಳನ್ನು ರಕ್ಷಣೆ ಮಾಡಿಕೊಂಡು ಮುಂದೆ ಸಾಗುತ್ತಿವೆ. ಬೇಲೂರಿನಿಂದ ಚಿಕನಹಳ್ಳಿ ಸುತ್ತ ಮುತ್ತ ಕೆಲ ಆನೆಗಳು ಉಳಿದುಕೊಂಡಿದ್ದರೆ, ಚಿಕನಹಳ್ಳಿಯಿಂದ ಮೂಡಿಗೆರೆ ರಸ್ತೆ ಕಡೆ, ಕೆಲ ಕಾಡಾನೆಗಳು ಆಗಮಿಸುತ್ತಿದೆ. ಕಸ್ಕೆಬೈಲು ಸುತ್ತಮುತ್ತ ಈ ಆನೆಗಳು ಸುತ್ತಾಡಲು ಪ್ರಾರಂಭಿಸಿದೆ. ಒಟ್ಟೊಟ್ಟಿಗೆ ಲಗ್ಗೆ ಇಡುತ್ತಿರುವ 45 ಕಾಡಾನೆಗಳು ಹತ್ತಾರು ಎಕರೆ ಕಾಫಿ ತೋಟಗಳನ್ನು ಸಂಪೂರ್ಣವಾಗಿ ಧ್ವಂಸ ಮಾಡಿ ಮುಂದೆ ಸಾಗುತ್ತಿವೆ.</p><p>ಮೂಡಿಗೆರೆ ತಾಲೂಕಿನ ಗೋಣಿ ಬೀಡು ವ್ಯಾಪ್ತಿಯಲ್ಲಿ ಮತ್ತೆ ಕಾಡಾನೆಗಳ ಸಂಚಾರ ಹೆಚ್ಚಾಗಿ ಕಂಡು ಬರುತ್ತಿದ್ದು, ಬೇಲೂರು ಮಾರ್ಗವಾಗಿ ಬಂದ 45ಕ್ಕೂ ಅಧಿಕ ಕಾಡಾನೆಗಳ ಹಿಂಡು ಭಾಗ ಭಾಗವಾಗಿ ಒಂದೊಂದು ಕಡೆ ಹೆಜ್ಜೆ ಹಾಕಲು ಪ್ರಾರಂಭಿಸಿದೆ. ಇಟಿಎಫ್ ಸಿಬ್ಬಂದಿಗಳು ಈ ಕಾಡಾನೆಗಳ ಮೇಲೆ ನಿಗಾ ಇಟ್ಟಿದ್ದು, ಸಂಚಾರ ಹಾಗೂ ಚಲನವಲನದ ಮಾಹಿತಿಯನ್ನು ಅಧಿಕಾರಿಗಳಿಗೆ ನೀಡುತ್ತಿದ್ದಾರೆ.</p><p>ಈಗಾಗಲೇ ಹಗಲು ರಾತ್ರಿ ಎನ್ನದೇ ಅರಣ್ಯ ಇಲಾಖೆಯ ಅಧಿಕಾರಿಗಳು ತಮ್ಮ ಜೀಪ್ ಮೂಲಕ ಮೈಕ್ನಲ್ಲಿ ಕಾಡಾನೆಗಳ ಇರುವಿಕೆಯ ಬಗ್ಗೆ ಸ್ಥಳೀಯರು, ರೈತರು ಹಾಗೂ ತೋಟದಲ್ಲಿ ಕೆಲಸ ಮಾಡುವ ಕಾರ್ಮಿಕರಿಗೆ ಮಾಹಿತಿ ನೀಡುತ್ತಿದ್ದು, ಎಚ್ಚರಿಕೆಯಿಂದ ಇರುವಂತೆ ಸೂಚನೆ ನೀಡಿದ್ದಾರೆ.</p><p>ಇದನ್ನೂ ಓದಿ: ಹುಲಿ ಸೆರೆಯಾದ ಊರಲ್ಲಿ ಮತ್ತೆರಡು ಹುಲಿ ಪ್ರತ್ಯಕ್ಷ; ಡ್ರೋನ್ ಕ್ಯಾಮೆರಾದಲ್ಲಿ ಅರಣ್ಯ ಇಲಾಖೆ ನಿಗಾ</a></p>
