<p>মৰিগাঁও: <i>"কল-পচলাৰ বিয়া, ভেকুলী আমাৰ দৰা,</i></p><p><i>আমি আশা কৰিছো বৰষুণ এজাক দিয়া…"</i></p><p>ৰাজ্যৰ বিভিন্ন প্ৰান্তত যেতিয়া প্ৰলয়ংকাৰী বানে হাহাকাৰ পৰিস্থিতিৰ সৃষ্টি কৰিছে, ঠিক সেই সময়তে ইয়াৰ সম্পূৰ্ণ বিপৰীত আৰু এক কৰুণ ছবি দেখিবলৈ পোৱা গৈছে মৰিগাঁও জিলাত । বিগত সময়ছোৱাত বানৰ কবলত পৰা জিলাখনত এইবেলি এক তীব্ৰ খৰাং পৰিস্থিতিয়ে দেখা দিছে । </p><p>আকাশত মেঘৰ গাজনি আছে যদিও পিয়াসী ধৰিত্ৰীক ভিজাব পৰাকৈ নাই এটোপালো বৰষুণ । তীব্ৰ খৰাঙৰ গ্ৰাসত পৰি এতিয়া মৰিগাঁৱৰ চহা কৃষকৰ হাড়ভঙা শ্ৰমেৰে জীপাল হোৱা পথাৰে পথাৰে দেখা দিছে চিৰাল ফাঁট । পৰিস্থিতি এনে এক ভয়াৱহ পৰ্যায় পাইছেহি যে কেৱল বয়োজ্যেষ্ঠ লোকেই নহয়, আনকি জিলাখনৰ কণ কণ শিশুসকলেও এতিয়া এই সংকটৰ গভীৰতা মৰ্মে মৰ্মে বুজি উঠিছে ।</p><p>প্ৰকৃতিৰ এই অনিয়মীয়া আচৰণ আৰু ভয়াৱহ খৰাং পৰিস্থিতিৰ পৰা পৰিত্ৰাণ পাবলৈ এতিয়া পৰম্পৰাগত লোকবিশ্বাসৰ আশ্ৰয় লৈছে মৰিগাঁও জিলাৰ মিলনপুৰৰ এজাক কণ কণ শিশুৱে । নেৰানেপেৰা খৰাঙৰ পৰা মুক্তি বিচাৰি আৰু ধৰিত্ৰী আইক শস্য-শ্যামলা কৰাৰ মানসেৰে এই শিশুসকলে আয়োজন কৰিলে এক ব্যতিক্ৰমী তথা আৱেগিক অনুষ্ঠানৰ । বৰুণ দেৱতাক সন্তুষ্ট কৰাৰ উদ্দেশ্যে গাঁৱৰ শিশুসকলে একত্ৰিত হৈ আয়োজন কৰিলে পৰম্পৰাগত 'কল-পচলাৰ বিয়া' ।</p><p>হাতে হাতে কলপচলা লৈ, থলুৱা বিয়ানাম গাই মিলনপুৰৰ আকাশ-বতাহ মুখৰিত কৰি তুলিলে এই কণ কণ শিশুসকলে । সমাজৰ প্ৰচলিত বিশ্বাস অনুসৰি, তীব্ৰ খৰাঙৰ সময়ত ভেকুলী বা কল-পচলাৰ বিয়া পাতিলে বৰুণ দেৱতা সন্তুষ্ট হয় আৰু ধৰালৈ বৰষুণ নামি আহে । সেই বিশ্বাস বুকুত বান্ধিয়েই নিষ্পাপ শিশুসকলে ভগৱানৰ ওচৰত কাতৰ প্ৰাৰ্থনা জনাইছে, যাতে এজাক জুৰণি পৰা বৰষুণে মৰিগাঁৱৰ শুকাই যোৱা পথাৰসমূহ পুনৰ জীপাল কৰি তোলে আৰু তেওঁলোকৰ পিতৃ-মাতৃৰ মুখলৈ হাঁহি ঘূৰাই আনে ।</p><p>লগতে পঢ়ক: বানৰ অভিশাপ ! জোনাইত এতিয়া চৌদিশে ধ্বংসৰ কৰুণ ছবি</a></p><p>প্ৰচণ্ড গৰমে দহিছে মৰিগাঁঁৱক: এজাক বৰষুণৰ আশাত চাতক চৰাইৰ দৰে বাট চাইছে জনতাই</a></p>
