Esciuta in "Théâtre de la Ville" (1981)<br />Tratta di l'affare Bastelica-Fesch<br />Parolle : Ghjacumu Thiers<br />Musica : Ghj. Poletti<br /><br />U ghjornu singhjuzzava a vigilia bughjura<br />I carrughji attuniti cuntavanu i so morti...<br />Tandu entre u pastore cum'è battelli à i porti<br />Calmi è s'indinoghja è sdrughje a paura<br /><br />Prega à core scioltu è si sparghje l'amore<br />S'hè zitta ancu l'aria aspettendu a chjama<br />Di a voce portapace chì tutta a ghjente abbrama<br />S'hè piatta ancu a zerga è parla u signore<br /><br />"Statu onniputente tù chì stai in l'imperu<br />Di forze accanite è di ferru è di focu<br />Lacami sti figlioli è lacami stu locu<br />Ùn mandà più saette contr'à u so addisperu<br /><br />Ùn parlemu di lege è guardemu li dritti<br />Si sò pisati tutti contr'à a to inghjustizia<br />Di mani è di voce ne cresce una divizia<br />Schizzerà torna u sangue sè tù ùn li lachi arritti"<br /><br />Ma queste ùn sò voce chì sente a preputenza<br />Hè debbule u Signore in pettu à u statu petra<br />I fiumi impauriti correnu à l'ombra tetra<br />Di a guerra chì rinnova quell'antica viulenza
