Le Beau Tetin<br /><br />Tetin refaict, plus blanc qu'un oeuf,<br />Tetin de satin blanc tout neuf,<br />Tetin qui fait honte à la rose,<br />Tetin plus beau que nulle chose ;<br />Tetin dur, non pas Tetin, voyre,<br />Mais petite boule d'Ivoire,<br />Au milieu duquel est assise<br />Une fraize ou une cerise,<br />Que nul ne voit, ne touche aussi,<br />Mais je gaige qu'il est ainsi.<br />Tetin donc au petit bout rouge<br />Tetin qui jamais ne se bouge,<br />Soit pour venir, soit pour aller,<br />Soit pour courir, soit pour baller.<br />Tetin gauche, tetin mignon,<br />Tousjours loing de son compaignon,<br />Tetin qui porte temoignaige<br />Du demourant du personnage.<br />Quand on te voit il vient à mainctz<br />Une envie dedans les mains<br />De te taster, de te tenir ;<br />Mais il se faut bien contenir<br />D'en approcher, bon gré ma vie,<br />Car il viendroit une aultre envie.<br />O tetin ni grand ni petit,<br />Tetin meur, tetin d'appetit,<br />Tetin qui nuict et jour criez<br />Mariez moy tost, mariez !<br />Tetin qui t'enfles, et repoulses<br />Ton gorgerin de deux bons poulses,<br />A bon droict heureux on dira<br />Celluy qui de laict t'emplira,<br />Faisant d'un tetin de pucelle<br />Tetin de femme entiere et belle.
