TIRANE -- Një gjobë rreth 40 milionë lekë të reja, e cila pretendohet nga Tatimet se nuk është shlyer nga Universiteti Ndërkombëtar i Tiranës, ka bllokuar rreth 400 studentë të futen në ambjentet e Universitetit për të zhvilluar mësimin. Mësohet nga burime nga Drejtoria e Tatimeve, se UNT ka 4 vjet pa paguar detyrimet që ka deklaruar vet.<br /><br />Inspektorët e Hetimit Tatimor dhe forcat e komisariatit numër 1, kanë rrethuar godinën e Universitetit Ndërkombëtar të Tiranës, pranë zonës të njohur si Vilat Gjermane, dhe nuk kanë lejuar asnjë person, nga stafi akademik apo studentë, të hyjnë në godinë.<br /><br />Burime pranë Drejtorisë së Tatimeve thanë për gazetarin e A1 REPORT, Gerti Xhaja se universiteti nuk ka shlyer gjobën prej 40 milionë lekë të reja. Studentët nuk janë lejuar të ndjekin studimet, ndërsa pritet shlyerja e detyrimeve nga Universiteti privat për të hequr masës e sekuestros nga hetimi tatimor.<br /><br />Në Universitetin Ndërkombëtar të Tiranës, studiojnë rreth 348 studentë nga Tirana dhe rrethet, por edhe nga Maqedonia, Mali i Zi dhe Kosova.
