Kaso: Qëndrimi i Ramës i nxituar, sinjale pozitive nga të huajt<br /><br />Pas propozimit të bërë në tryezën e thirrur nga OSBE-ja, Partia Demokratike sqaron arsyen pse kërkon që rol kryesor në Reformën Zgjedhore të kenë ndërkombëtarët.<br /><br />Sekretari për Çështjet Zgjedhore në selinë blu, Ivi Kaso, njëherazi një ndër ekspertët e opozitës në konferencën e së mërkurës, bën një analogji mes këtij procesi dhe Reformës në Drejtësi, e cila u udhëhoq nga ndërkombëtarët.<br /><br />Por Kryeministri Rama u shpreh i prerë se nuk do të pranojë asnjë strukturë ndërkombëtare për t?u marrë vesh me opozitën jashtë parlamentit për Reformën Zgjedhore. Kaso e sheh këtë deklaratë të nxituar dhe e fton të lexojë qëndrimet e ndërkombëtarëve.<br /><br />Mbështetja mungoi edhe nga kreu i prezencës së OSBE-së në Tiranë, i cili u shpreh se Shqipëria është një vend i pavarur dhe ka qeverinë e saj të zgjedhur nga shqiptarët.<br /><br />Opozita e bashkuar propozon që procesi i Reformës Zgjedhore të drejtohet nga një strukturë e përbërë nga përfaqësues të organizmave ndërkombëtar (OSBE/ODIHR, BE, SHBA), një përfaqësues i mazhorancës dhe një i opozitës së bashkuar.<br /><br />Produkti i dakordësuar nga kjo strukturë, pasi t?i nënshtrohet konsultimit me publikun, do të duhet të miratohet në parlament pa ndryshime.<br /><br />Tv Klan
